Cylch Chwarae Ceredigion yn ennill gwobr yng Ngwobrau Blynyddoedd Cynnar Cymru
Mae Cylch Chwarae Ceredigion wedi ennill gwobr yng Ngwobrau Blynyddoedd Cynnar Cymru a gynhaliwyd yn Aberporth ddydd Mercher, 11 Medi 2024.
Mae Cylch Chwarae Dwyieithog Aberporth sy'n darparu addysg yn sector nas cynhelir i Gyngor Sir Ceredigion wedi ennill Gwobr 'Y Byd y tu allan' yn dilyn eu hymrwymiad i ddefnyddio'r amgylcheddau naturiol yn yr awyr agored i ddatblygu dysgu plant a manteisio ar hyfforddiant ysgol goedwig drwy’r Cyngor.
Er nad oes ganddynt ardal awyr agored ynghlwm wrth y lleoliad, maent yn manteisio ar amgylcheddau naturiol a lleoedd amrywiol ar gyfer gweithgareddau awyr agored o fewn pellter cerdded hawdd o’r Cylch Chwarae. Maent yn archwilio coedwigoedd lleol, ac yn darparu offer a chyfarpar digonol, heriol, a diddorol sy’n cael eu defnyddio mewn amrywiaeth o ffyrdd i ddatblygu dysgu’r plant.
Dywedodd Rhiannon a Katie, Arweinwyr Cylch Chwarae Aberporth: “Mae’r staff yn ddiolchgar iawn am y gydnabyddiaeth hon! Mae’r staff wedi gweithio’n ddiflino i greu amgylchedd meithringar i’n dysgwyr ifanc, ac mae’r cyflawniad hwn yn dyst i’w hymroddiad. Diolch o galon i’n pwyllgor rheoli sydd wedi bod yn gefnogol iawn dros y flwyddyn ddiwethaf. Mae’r lleoliad yn ddiolchgar i’r plant, rhieni, staff a chefnogaeth Cyngor Sir Ceredigion.”
Ychwanegodd y Cynghorydd Wyn Thomas, Aelod Cabinet Ceredigion ar gyfer Ysgolion, Dysgu Gydol Oes a Sgiliau “Mae’r gydnabyddiaeth hon yn tynnu sylw eu cyflawniad rhagorol yn y byd y tu allan. Mae’r staff wedi gweithio’n ddiflino i greu amgylchedd meithrin i’n dysgwyr ifanc ac mae’r cyflawniad hwn yn dyst i’w hymroddiad. Llongyfarchiadau i bawb a gymerodd ran!”
I gael rhagor o wybodaeth am Wobrau Blynyddoedd Cynnar Cymru, ewch i: www.earlyyears.wales/cy/gwobrau-blynyddoedd-cynnar-cymru