Agoriad cae pob-tywydd Canolfan Hamdden Plascrug
Mae Cyngor Sir Ceredigion yn falch iawn o gyhoeddi bod y cae pob-tywydd newydd ger Canolfan Hamdden Plascrug wedi'i gwblhau ac ar agor i’w ddefnyddio. Mae'r cyfleuster yma, sydd o'r radd flaenaf, nawr ar gael i'w ddefnyddio gan bawb yn y gymuned.
Derbyniwyd cyllid hael iawn gan Chwaraeon Cymru, Cronfa Ffyniant Cyffredin y DU, a Chyngor Sir Ceredigion i gwblhau’r gwaith, ac fe’i cyflawnwyd drwy Fframwaith Hamdden y DU ac Alliance Leisure.
Mae'r cae chwarae pob-tywydd yn cynnwys carped byr ar sylfaen o dywod, sy'n ei wneud yn addas ar gyfer nifer o chwaraeon. Bydd hi’n bosib chwarae pêl-rwyd, hoci, pêl-droed a rygbi cyffwrdd arno. Bydd yr arwyneb aml-bwrpas yma yn sicrhau bod amrywiaeth eang o bobl yn gallu mwynhau profiadau chwaraeon o safon uchel. Mae llifoleuadau LED ynni effeithlon hefyd wedi'u gosod i alluogi chwaraewyr i ddefnyddio’r cyfleuster trwy gydol y flwyddyn.
Dywedodd y Cynghorydd Catrin M S Davies, Aelod Cabinet dros Ddiwylliant, Hamdden a Gwasanaethau Cwsmeriaid: “Mae’r cae pob-tywydd newydd yng Nghanolfan Hamdden Plascrug yn enghraifft wych o sut mae’r Cyngor wedi ymrwymo i ddarparu cyfleusterau chwaraeon o safon uchel i bobl Ceredigion.
“Mae’n wych gweld trawsnewid ardal segur yn gae chwarae modern, aml-bwrpas, deniadol, a bydd yn ehangu ar yr y cyfleusterau sydd i’w cael yng ngogledd y Sir. Y gobaith yw y bydd yn cefnogi ac yn gwella lles cymunedol.”
I gael rhagor o wybodaeth am y cyfleuster newydd, cysylltwch â Chanolfan Hamdden Plascrug ar 01970 624579.